Lailao Banner
Link ທີ່ຂໍແນະນຳ!
Recommended Link!
 
 
 
 
 
ຜູ້ສະນັບສະໜຸນ
 
 
 
 
 
 
 
 
 
 
Home button gallery bt Download button Service button About us button

......<ຍິນດີຕ້ອນຮັບສູ່ເວັບໄຊ ລາຍລາວ> ......

......<Welcome to LaiLao Website>.....

  ປະ​ເທດ​ລາວ​ຂອງ​ພວກ​ເຮົາ ​ເປັນ​ປະ​ເທ​ດທີ່​ອຸດົມສົມບູນ​ໄປ​ດ້ວຍ​ຊັບ​​ໃນ​ດິນສິນ​ໃນ​ນ້ຳ ​ແລະ ພູມ​ປັນຍາ​ອັນ​ງົດ​ງາມ ​ໃນ​ນັ້ນ​ສີ​ລະ​ປະ​ລາຍ​ລາວ ກໍ​ອັນ​ເປັນ​ໜຶ່ງ​ເອກະລັກ​ທີ່​ບົ່ງ​ບອກ​ເຖິງ​ຄວາມ​ອ່ອນ​ຊ້ອຍ​, ງົດ​ງາມ ​ແລະ ຄວາມ​ຫົວຄິດ​ປະດິດ​ສ້າງ​ຂອງ​ຄົນ​ລາວ​ເຮົາ​ມາ​ຕັ້ງ​ແຕ່​ບູຮານ​ນະ​ການ​​ແລ້ວ. a

     ສີ​ລະ​ປະ​ລາຍ​ລາວ ຫຼື ​ເອີ້ນ​ສັ້ນໆ​ວ່າ “ລາຍ​ລາວ” ​ເຊິ່ງໃນເວັບນີ້ ທ່ານ ຈະໄດ້ພົບ​ກັບ​ຄວາມ​ຮູ້, ປະຫວັດ, ຮູບແບບ ລວມທັງ​ແນວຄິດ ໃນການອອກແບບ​ລາຍລາວ ໃນຍຸກ ດິຈິຕໍ ຄືດັ່ງປັດຈຸບັນນີ້ ເຊິ່ງ ເຫັນໄດ້ວ່າມີ​ບົດບາດຫຼາຍ ໃນວົງ​ການ​ໂຄສະນາ ອອກແບບ ກຣາບຟິກ​ຕ່າງໆ ໃນບ້ານ​ເຮົາ ເພາະວ່າ ການນຳເອົາ ລາຍ​ລາວ ມາປະ​ຍຸກໃຊ້​ໃນການ​ອອກແບບ​ໃນສື່ຕ່າງໆ​ນັ້ນ ແມ່ນ​ໄດ້ຮັບ​ຄວາມ​ນິຍົມ ແລະ ເປັນ​ສັນຍະລັກ​ທີ່ສື່​ເຖິງ​ຄວາມ​ເປັນລາວ​ເປັນຢ່າງດີ ແລະ ທັງເປັນການ​ອະນຸລັກ ແລະ ສົ່ງເສີມ ວັດທະ​ນະທຳ​ລາວ ໄປໃນໂຕ

​     ເນື່ອງ​ຈາກ​ສິລະ​ປະ​ລາຍ​ລາວ​ມີ​ຄວາມ​ໜ້າ​ສົນ​​ໃຈ​ຫຼາຍ ຕໍ່​ນັກ​ອອກ​ແບບ​ທົ່ວ​​ໄປ ກໍ​ຄື​ຄົນ​ຕ່າງປະ​ເທດ ​ໂດຍ​ສະ​ເພາະ​ກໍ​ແມ່ນ​ຜູ້​ທີ່​ສົນ​ໃຈ​ຮັກ​ມັກ​ເລື່ອງ​ສີ​ລະ​ປະການ​ອອກ​ແບບຮຸ້ນຫຼັງໆທີ່​ນຳ​ໃຊ້​ຄອມ​ພິວ​ເຕີ​ໃນ​ການ​ອອກ​ແບບ​ຜົນງານ​ກຣາບຟິກ ​ທີ່​ໃຊ້​ໃນ​ຮູບ​​ແບບ​ສື່​ຕ່າງໆ ຈຶ່ງ​ເຮັດ​ໃຫ້​ເກີດ​ມີ​ເວັບ​ໄຊ້ລາຍ​ລາວ​ແຫ່ງ​ນີ້ ​ແລະມີຈຸດປະສົງຫຼັກ​ໃນ​ການນຳ​ສະ​ເໜີ ​ເວັບ​​ໄຊ້ ນີ້ ຄື

  • ​​ເພື່ອ​ຍົກ​ບົດບາດ​ຂອງ​ລາຍ​ລາວ​ອີກ​ຮູບ​​ແບບ​ໜຶ່ງ​​.
  • ​ເພື່ອ​ເປັນ​ການ​ເຜີຍ​ແຜ່ ຜົນງານ​ສີ​ລະ​ປະວັດ​ທະນະ​ທຳ​ລາວ(ລາຍ​ລາວ) ​ໃຫ້ກວ້າງຂວາງຫຼາຍ​ຂຶ້ນ.
  • ​ເພື່ອ​ສ້າງ​ທັດສະນະ​ໃໝ່ໆ​ກ່ຽວ​ກັບຜົນງານ​ດ້ານ​ສີ​ລະ​ປະ​ໃຫ້​ແກ່​ຜູ້​ທີ່​ສົນ​ໃຈ.
  • ​​ເປັນ​ການ​ນຳ​ເອົາ​ລາຍ​ລາວ ມາປັບປຸງ ​ແລະ ນຳ​ໃຊ້ ​ໃຫ້​ທັນ​ຍຸກ​ທັນ​ສະ​ໄໝ ​ແລະ ​ເກັບ​ໄວ້​ໃນ​ຮູບ​​ແບບ​ດິຈິ​ຕໍ(Digital Format).
  • ​ເພື່ອ​ປຸກລະດົມ​ໃຫ້​ບັນດາ ນັກ​ສີ​ລະ​ປິນ ນັກ​ອອກ​ແບບລາວ ຊ່ວຍ​ກັນ​ຮັກສາ ​ແລະ ພັດທະນາ​ລາຍ​ລາວ​ອັນ​ເປັນ​ຜົນງານ​ທາງ​ດ້ານ​ສີ​ລະ​ປະ ການ​ປະດັບ​ປະດາ​ຂອງ​ຊາດລາວ ​ໃຫ້​ຫຼາຍ​ຂຶ້ນ.
  • ​ເພື່ອ​ສົ່ງ​ເສີມ​ໃຫ້ ​ມີ​ການ​ນຳ​ເອົາ​ສີ​ລະ​ປະ​ລາຍ​ລາວ ​ມາ​ນຳ​ໃຊ້​ກັນ​ໃຫ້​ຫຼາຍ​ຂຶ້ນ ​ໂດຍ​ສະ​ເພາະວຽກງານ​ການ​ອອກ​ແບບຕ່າງໆ ກ່ອນ​ທີ່​ຈະ​ສູນຫາຍ​ໄປ.
  • ​​ເພື່ອ​ແນະນຳ, ​ແລກປ່ຽນ​ບົດຮຽນ ​ເທັກ​ນິກຕ່າງ​ໆ ​ໃນ​ການ​ອອກ​ແບບຂອງ​ນັກ​ອອກ​ແບບທົ່ວ​ໄປ ​​ເພື່ອ​ເຮັດ​ຈັ່ງ​ໃດ​ໃຫ້ ລາຍ​ລາວ ມີ​ຄວາມ​ພົ້ນ​ເດັ່ນ​ກວ່າ​ທີ່​ຜ່ານ​ມາ.

ລາຍ​ລາວ” ​ພົບ​ເຫັນ​ຢູ່​ໃສ​ແດ່? ​ແລະ ເພິ່ນ​ນຳໃຊ້​ເຮັດ​ຫຍັງ​ໄດ້​ແນ່?

  • ​​​ໃຊ້ປະດັບ​ປະດາຕາມສາສະໜາສະຖານ(ວັດ) ​ເຊິ່ງມີ​ຮູບ​ແບບ​ ແລະ ​ເທັກ​ນິກການກໍ່ສ້າງ ແຕກ​ຕ່າງ​ກັນ​ໄປ​ຕາມ​ແຕ່ລະ​ທ້ອງ​ຖິ່ນ ​ເຊັ່ນ:​ ປະຕູ​ໂຂງ​ວັດ, ບານປະຕູ, ລວດ​ລາຍຕາມ​ເພດານ, ຕາມ​ຝາຂອງ​ສິມ, ຫໍ​ແຈກ ເຊິ່ງມີ​ມາ​ຕັ້ງ​ແຕ່​ບູຮານ​ນະ​ການ​ແລ້ວ ​ແລະ ປັດຈຸບັນ​ກໍ​ຍັງ ມີນາ​ຍຊ່າງ​ທີ່​ເຮັດ​ວຽກ​ກ່ຽວ​ກັບ​ລາຍ​ລາວທີ່​ສາມາດ​ສ້າງ​ລາຍ​ໄດ້​ເປັນ​ຢ່າງ​ດີ.
  • ພົບ​ເຫັນ​ໃນ​ເຄື່ອງ​ໃຊ້​ສອຍ, ວັດຖຸ​ມີຄ່າ​ຕ່າງໆ ​ເຊັ່ນ: ຂັນ​ເງິນ, ສາຍ​ແອວ​ນາກ….
  • ​ເຫັນ​ໃນ​​ເງິນ​ກີບ​ລາວ ທີ່​ໃຊ້​ລາຍ​ລາວ​ ໃນ​ການ​ອອກ​ແບບປະກອບ​ຢູ່​ນຳ ແລະ ​ຈະ​ພົບ​ເຫັນ​ໄດ້​ໃນເງິນ​ກີບປະ​ເພດ​ຕ່າງໆ ທຸກ​ຍຸກ ທຸກ​ສະ​ໄໝ.
  • ​ນຳ​ໃຊ້​ເຂົ້າ​ໃນ​ງານ​ຫັດຖະກຳ​ ​ເຟີ​ນີ​ເຈີ​ຕ່າງໆ ​ເຊັ່ນ: ງານ​ແກະສະຫຼັກ, ພາບ​ແຕ້ມ, ສິ່ງ​ພິມ​ຕ່າງໆ​ເຊັ່ນ: ປື້​ມວາລະສານ, ປະຕິທິນ​ເປັນ​ຕົ້ນ…
  • ນຳ​ໃຊ້​ອອກ​ແບບ​ໂລ​ໂກ້ ​ເຊັ່ນ: ​ໂລ​ໂກ້ກະຊວງ​ສຶກສາ, ​ໂລ​ໂກ້ມະຫາວິທະຍາ​ໄລ​ແຫ່ງ​ຊາດ, ບໍລິ​ສັດ​ນຳ​ທ່ຽວ​ຕ່າງໆ ​ແລະ ອື່ນໆ ທີ່​ຕ້ອງການ​ສື່​ໃຫ້​ເຫັນ​ຄວາມ​ເປັນ​ລາວ.
  • ​​ໃຊ້​ອອກ​ແບບ ​ເປັນ​ສ່ວນປະກອບ​ກັບ ​ຜະລິດ​ຕະພັນ ຫຼື ສັນຍະລັກ​ຕ່າງໆ ທີ່​ຕ້ອງການ​ສື່​ເຖິງ​ຄວາມ​ເປັນ​ລາວ.
  • ສາມາດ​ໃຊ້​ໃນ​ການ​ອອກ​ແບບ ສື່​, ​ໂຄສະນາ​ປະ​ເພດ​ຕ່າງໆ.
  • ​ແລ​ະ ອື່ນໆ ຕາມ​ຄວາມ​ຄິດ​ສ້າງສັນ ​ແລະ ຄວາມ​ສາມາດ…

     ​ເຫັນ​ໄດ້​ວ່າ ຜົນງານ ລາຍ​ລາວ ສາມາດ​ ປະຍຸກ​​ໃຊ້​ກັບ​ວຽກ​ງານ​ການ​ອອກ​ແບບຕົກ​ແຕ່ງ ຫຼາກ​ຫຼາຍ​ປະ​ເພດ ດັ່ງ​ນັ້ນ​ຈຶ່ງ​ບໍ່​ແປກ​ທີ່​ຈະ​ມີ​ເວັ​ບ​ໃຊ້​ທີ່​ກ່ຽວ​ກັບ​ລາຍ​ລາວ ​ແຫ່ງ​ນີ້ :)

 
 
         
 

ຂອບ​ໃຈທຸກ​ທ່ານ​ທີ່​ເຂົ້າ​ມາ​ຢ້ຽ​ມຊົມ !

Thank you for visited!